Kréol dobouté

Kréol dobouté
Pi kapoté
Dann santyé kabri
Nout monmon patri
Kréol dobouté
Pi kanoté
Nou lé sardagarigatiré
Dann trasé malizé

Tyinbo anou
I ral anou
Dann la kol zak la flinm lasistans

Kréol dobouté
Po nou kriyé
Na bat si roulèr

Po fé pèt féklèr

Kréol dobouté

Po nou santé

Bouzbouzé sokouyé nout kavir

Po nou war la limir

 
Na tir fénwar

Si nout listwar

Kit pa détrwa dégrinn nout léspwar

Kréol dobouté
Po nou dansé

Anon maloyé

La tèr na damé

Kréol dobouté

Po kadansé

Anon kas lo rin

Ansanm avèk na fé linité

Kas makadanm
Nou minm na pilé

Po marsé dann somin la dinité

Kréol dobouté
Po nou trapé

Talèr lé po nou

Tèrla sa ta nou

Kréol dobouté

Po nou trasé

Anon mèt la min

Na daloné po nou viv ansanm

Ansanm ansanm
Na mèt ansanm

Anon prann viv sanm nout libèrté